اسكندرية

يااسكندرية بحرك عجايب
ياريت ينوبنى من الحب نايب
تحدفنى موجة على صدر موجة
والبحر هوجة والصيف مطايب
اغسل هدومى ..
وانشرهمومى ..
على شمس طالعة وانا فيها دايب

كأنى فلاح من جيش عرابى
مات ع الطوابى وراح فى بحرك
كأنى نسمة فوق الروابى
من البحر جاية تغرق فى سحرك
كأنى كلمة من عقل بيرم
كأنى غنوة من قلب سيد
كأني جوا المظاهره طالب
هتف باسمك ومات معيد
كأني صوت النديم في ليلك
بيصحي ناسك يشدوا حيلك
كأني طوبه من بيت في حاره
كأني دمعه في عيون سهارى
كأني نجمه فوق الفناره
تهدي الحيارى والبدر غايب

يا اسكندريه .. يامصراويه
على سن باسم .. على ضحكه هاله
البحر شباك ومشربيه
وانتي الاميره ع الدنيا طاله
يا اسكندريه .. عاشق وبدي
ارتاح في حضنك .. والود ودي
يكون كلامي .. عربون غرامي
وبالمحبه ناخد وندي

يا اسكندريه فيكي الغلابه
ع الرزق يسعوا ولايناموش
صبح صباحهم رجع مساهم
وزاد شقاهم .. ومارتاحوش
يا عيني ع اللي الزمان تعبهم ..
وضاع تعبهم ومالتقوش ..
نزل شبكهم في بحر طامي ..
طلع شبكهم على فاشوش ..
وفيكي بين البشر .. ديابه
وفيكي فوق البشر .. وحوش
وفيكي ناس مغرمين صبابه
لو خان زمانهم مابيخونوش
وفيكي خمري .. سلمت امري
ما اقدرش اشوفه .. وما اغنيلوش