خطاب رسمي

خطاب رسمي بعلم وصول يسلم يداً باليد
وحق الراسل المكفول على المرسل إليه الرد
الى السيد ضمير الناس تحياتي أما بعد
محدش فينا طايق حد بقت أيامنا ضلمة وبرد
وضحكة قلبنا الصافية بقت ماضي
بنفرح بالسفر والبعد بفرح لما نخسر بعض
بيضيع عمرنا سرعة وع الفاضي
بقا الميت رقم مثبت على نوتة
ونتخانق شهيد او لأ
ونقتل بعض في خلافنا على الموتة
ومين فينا شهيد الحق
بنتعازم على القسوة اللي في قلوبنا
ونتعاير على ظروفنا وعلى عيوبنا
وعايشين بالدراع والزق
فيا سيد ضمير الناس ياريت تصحى وتصحى الناس
ساكت ليه على نفسك وليه راضي
بقيت تايه بقيت متداس
لا فيك فايدة ولا احساس
وكالعادة مبتردش وده العادي
محدش همه غير القرش والأكلة
وكله ع الدماغ بالدق
محبش حلمنا ينور عمل قفلة
وسابهالنا كده بتغمق
خلاص كل الوحش فينا بقا الغالب
وده المطلوب وده السايد وده العاجب
بقت غابة بقت غابة وتاه الخلق