اخر حبيب

قلت لك يا قلب لا تآمن غريب
ليش تحرقني معاك وتحترق
بهالزمن ينساك حتى اقرب قريب
الوفا في هالزمن حبر وورق

انا مو اول ولا اخر حبيب
في النهاية مع حبيبة يفترق
من متى صابت معي حتى تخيب
البخت وياي عمرده ما صدق

من يداوي جرحي اللي ما يطيب
من يرد اللي من ايامي انسرق
البحر عالي وفي صمته رهيب
والا قلبك ما يخاف من الغرق

الغريب اني وانا بجمبك غريب
لو نحاول نتفق ما نتفق
ايه يا قلبي معاه مالك نصيب
من فراقه لا تشب وتحترق

شلون اصير الجرح واصير الطبيب
لو سكت الجرح فعيوني نطق
ما تغيب الشمس لو عني تغيب
لو اموت الفين مره واختنق



(( الموال ))


حرقتي اعصاب اعصابي دخيل الله
جنون غيره على هالحال يوميا
ولا من زعلتي قلبتي عالمي كله
وعيوب خلق الله تحطينها فيه
ولا من رضيتي تناديني هلا والله
دنياي عقبك بعد عمري رمادية
خليني ارتاح حالي حال خلق الله
انسى الشقى والتعب والهم موليه