الطمبرة والغناي

نحن اهل الفرحة جينا لا المدامع وقفتنا ولا الحكايات الحزينة
لما درب الرايحة جابنا جابنا فى هادى المدينة
ياولدى الدروب شقاقة بحر التيه
ليك درب ولا دربين مساك الدروب ضهاب
ليك قلب ولا بالين سواى القلوب كضاب
ليك ضهر ولا سرجين ركاب السروج وقاع
شق ياولدى بحر التيه بتدردر وتتودر
ولامن يوم على دارك تقف ترسى نعزك بالقبيل داخرنو ليك
الشوق بحر ياولدى بحر التيه
قتليك العليك ادرابو لا تنغش ولا ترضابو لا تنغش
فى الزمن الزمين والكيس
عشان النى
عليك الدو ر وتصريف الليالى بدور تشيل ما شلنا من الهم
ولامن دمعة ترمى الدمعه فوق دربك
روح يابا
وابقى قفاك لا تعاين
ولا تعاين على موطاك
ولا تندم على خطوا تملى مشيتو لى قدام
وابقى العاتى زى سنتتنا زى صبرا نلوك فوق مرو زى الزاد
لا شيتا نزل فى الجوف ولا برجع ولا بنزاح
واركز لى البجيبها الريح تقيف انت وييشيلها الريح
وابقى العاتى والدرب الوراك مسدود
شيل شيلتك بقيت للنص
لا حلما يجيبها البر و لاحدوته
امبليتها اختى الرملة ما تقع المكان الهش
دى الممطورة ما بتبالى من الرش
النعمة بتعرف عاطيها والجمرة بتحرق واطيها
بالكيلة عطانا وما لقينا
فوق جمر خطانا ما لقينا
يوم الوعد يا ياحليوة فيك
الدنيا ما كانت شروق
الا الارض متكشفة ومتبلمة
نعم انو من خير الخريف لافحالها شال
يوم الوعد الفرحة خضرا فرحة دوب تتشابى لى عين الشمس
من بت حليوة اللابسة بيضا
بيضا كذا الحليب
والروح مشحتفة فى البلود الفيها ريحتك
للبعود من فزعة الغربة البسساق فوقها
لا راجع ولا بالحيل قريب
والروح مشحتفة فى الحبيب القلب بكر
الدنيا ما شافت جديدو ولا الحزن دقالو باب
لو شفتى كيف يوم الوعد كيفنو مترامى الغمام
القمرى زغرد للبلوم
والنسمة هبت مرتين
ياحليوة يوم دقيت فى ارضك فاس خصيب والتانية فى يوم الوعد
والايد تسالم فى الايدين
والام تقالد فوق جناها تشمو زين
حليوة صاحية حليوة حليوة ضاحية كذا النسيم
يوم الوعد الدنيا غيم وحليوة جد جد ياولد
كل البلد قايل غناوى الحزن ليش
شايل مساديرك مجابر دمع ليش
ليش يابلد والناس تريد والدنيا كل مانريد تزيد
تملى الايدين تفرح تهش تفرح تهش تملى الايدين
لو صحيح غنينا بالدمعه الحزينة
لو دموع الفرحة ما لاقت غنانا
بكرة نرجع تانى للكلمه الرحيمة
شان هنانا شان منانا
شان عيون اطفالنا ماتضوق الهزيمة