دحه شماليه

يا محلى طاروق الدحه
لا وافق له صوت وبحه
صفين .. وحاشي ومصنع
وبيوت الشعر ممليه
متون تدحم بعضها
وقلوب زايل مرضها
واصوات سباع بتاعه
ميه ميه .. ميه ميه
غناها عمي مع خالي
وانا اغنيها لعيالي
تاريخ وبصمه معروفه
اصليه من بطن اصليه
لعبة حرب ولعبة هيبه
مافيها حاجه معيبه
لا والله نفخر لي قلنا
دحيه يا أهل الدحيه
ماهي لهبة هشك بشك
مصيونه عن نيات الشك
محشومه من حشمة وايل
ماهي دبكات شاميه
وانا طاريها سلاني
وقمت أرددها بلساني
ولا صحيت إلا الترفه
تشبك إيديها بإيديه
تضحك وتعضض مبسمها
والضحكه ذابت بفمها
قالت لي : تكفى يا مطلق
أبغى دحه شماليه
قلت الغالي يطلب غالي
قومي حوشي لي بعقالي
يالله نبدا بدايه فعليه
يا بنيه قومي غني لي
يا ويلي منك يا ويلي
وانا اصفق واغني
يا بنيه ميلي يا بنيه
حبيني يا ريحه جدي
تراني جيتك متحدي
اللي عن دربي يحدونك
أهل النيات الملويه
أبي أتفنن بأوصافك
لأجل يشوفك ملا شافك
وصف حي وتمشي روحه
من روح الشعر وراعيه
خدودك بيض مفروشه
من ورد الجوري مرشوشه
افتح من حب الرمانه
واغمق من شمس العصريه
وشفاتك لمة حبايب
كانت فرقاهم غصايب
الفوقيه فيها معاند
والطاعه عند الحدريه
وحجاجك مبري ومقوس
ورموشك لرضاه تهوس
وان طار وكسر جبينك
أغديت الحسنه بالسيه
وإن جيتي تمشين وعجله
وعيونك بعيوني خجله
والقذله تضحك للغربي
والغربي يضحك عليه
كن القاع تعد خطاتك
والا تحلف لك بحياتك
شي ماقالو لي عنه
شوفة ذيه وشوفة ذيه
شفافه ذوق ولبيسه
لبسك ملبوس برنسيسه
وان تلثمتي بالشيله
كنك من اهل الشرقيه
يقلدونك حتى خواتك
حتى في لبسة عباتك
لكن قولي لي من يجمع
بين الشمس وبين الفيه
يوم الله خلقكم فرق
ماغرب بالزين وشرق
خصه فيك وعمه فيهم
سبحانه جزل العطيه
والحين ابغي رايك فيها
من أولها لتاليها
عساني مرضي غرورك
يا ام العيون السحريه
قالت تعرف رايي مبطي
لاتخطي تكفا لا تخطي
ماذوبني غير اشعارك
فديت الشعر وراعيه
أنا ضحية قصيدك
لكن لي شرط بجديدك
ابغى من اليوم وطالع
تلعب دحه شماليه