ضحكي بيديك

ضحكي بيديك .. ودمعتي .. برضو.. نواصيها بيديك
تقدر تضحّكني وتبكيني ..وتلحق مشتهاك
الله عطاك .. وسلّمك أمري .. وأمري محتويك
إحفظ حقوقي .. وإلطف ب حالى .. بعد ما الله عطاك
العفو عند المقدرة .. والعدل شيمة والديك
وأنا ولد هادي معك .. وأكبر مشاغب .. من وراك
هنا آتفّرق منك .. وهناك اجتمع .. وآذوب فيك
والخوف جايز . من هنا .. والموت حتمي من هناك
وأكبر دليل إني .. ليا حاولت .. يوم أزعل عليك
لقيت قلبي كل ما يزعل .. يدوّر عن رضاك
وإذاك تذكر . يوم كنّا بين أجيك أو ما اجيك
وشلون قلبي كسّر .. الرهبة تحت صدري .. وجاك؟
ماجاك.. يهلك في نجاتك .. جاك ينجى بك .. هليك
لنّ .. النجاة (بما تنص اللائحة )عندك هلاك
ياللى.. هلاكك .. مبتكر على نظام الهدروليك
مهما يكن حجم الألم .. يمنع وجود الإرتباك
لبّا الهلاك اللي كذا .. يوم انتهي به .. وأبتديك
وألقى نظام الطيش .. يرسمني على فوضة صباك
وأنا ولا أدري . لبه أنا أظما لك؟ وأنا أقدر أرتويك ؟
تدري؟ أقولك شي؟ أحلا شي ؟ يوم أروى ظماك
أبيك ياعمري .. وإذا ما تعجبك كلمة .. أبيك
خذها ب لهجة ساكنيين (دبي) ياعمري أباك
يكفيك لامن غبت .. مالك إسم .. غير إسم المليك
وإن جيت عقب غياب ..مالك إسم ..غير إسم الملاك
حشمة غلا .. وإلا غلا حشمة .. وذيك تعز ذيك
غلاك يفضح حشمتك .. وبحشمتك .. يُستر غلاك
يا قبلة الله .. كل ما أتخيّل.. تقوّس حاجبيك
لاطارت عيونك عجب .. وأغضيت من زايد حياك
أفقد وجود الجاذبية ..وأرتفع لك .. هيك هيك
وأطلع بعد أكثر .. وأكثر .. لين تحضني سماك
وألقى سماك ..تلفّني من حول .. كوكب ناظريك
وأسمع .. مماليك الكسل .. تفخر ب عهد الإمتلاك
حالة .. تجرّد .. وإرتجاج .. وهلوسة .. تنسب إليك
أمّا أتحمّلها ..عنك .. وإلا أتحمّلها معاك
مع إن مالي ذنب .. بس أقول .. يرضى لي عليك
الله يسعد لي صباحك .. قبل يسعد لي مساك
شفت إن ربّي .. سلّمك أمري .. ولا لك أي شريك
إلا أنت .. وعيونك .. وخدّينك .. وتذويبة شفاك