انا بليت بحبكم من هبالي
والا انت ظل مالنا فيه مقيال
خيرك لغيري والشقا والعنا لي
والمشكل اني عارف كل الاحوال
ارمي بروحي في بحرك الزلالي
وتنسفني امواجك على يابس الجال
اسال فراشي كيف امضي الليالي
بالليل لي حال ومعكم لي احوال
من خوفي الشمات تشمت بحالي
ويكثر على من العدا القيل والقال
انت السبب ولعتني ياغزالي
وفتحت لي دنيا جديدة بالامال
وابعدت خلاني وجيتك لحالي
وفرشت قلبي لك مقر ومدهال
ويوم ابعدن حبالهم عن حبالي
ودريته انك عندنا غالي المال
ابديت عقب الحب صافي الجفا لي
وخليتني محتار في اشهب اللال
نصيت رب عالم ماجرا لي
ماحط دون الخلق حاجب ومرسال
منحني السلوان منشي الخيالي
ورد الحياة لسايل ماطلب مال
وابعد خيالك خالقي عن خيالي
وقصر علي الليل من عقب ماطال
واليوم ترسل لي وتبدي الوفالي
وتبدي لي اعذار قصيرات وطوال
تبي تجدد ما انقطع من وصالي
وتبدي من الفتنة لي الوان واشكال
تردني في حالي اللي مضى لي
ترضي غرورك بس ياحسن الاقبال
ماعاد تخدعني عقب مابدا لي
وان عدت فيما عفت مانيب رجال