سمعت من نادى

سمعت من نادى
سمعت من نادى على راس عالي * رجمٍ طويلٍ يدهله كل جرناس
وانا شراته حرك الشوق بالي * في جو عالي مرتفع للسما راس
الله من طاري بفكرٍ طرالي * سيطر على الاحساس عن كل هوجاس
خذني براس النايف اللي فضالي * والافكار من كثر الموازين ترّاس
جو المحبة والهوى كم صفالي * قطفت وردٍ من على الخد نفاس
لقيت به لي في ركونه مجالي يرتاح به من كان بوقلب حساس
وجدٍ طرالي والخوالي ذهالي * وقدت له من شمع الاحساس نبراس
واسقيت غرسه من معينٍ صفالي * سحرٍ حلال ينير حبره في الاطراس
لو ينقرا للي همومه ثقالي * تنفرج همومه ويصبح بنوماس
ولو ينكتب ثم ينمحى بالزلالي * يشفي الذي في صدره انكال وارجاس
بي من رسيس الشوق صعب المنالي * ما يندرك وصفه وللشوق رسّاس
وبي من ليالي شحها بالوصالي * للي غدالي بين روحي والانفاس
حسنه مثالي .. آيةٍ في الجمالي * عذّب فؤادي وما رحم عذب للعاس
تذبح عيونه من فتون ودلالي * برموش تدمي كنها رماح نكاس
قلبه من الليعه مريح وسالي * وانا بقلبي نار حسرة وهوجاس
بيني وبين النوم حربٍ سجالي * إن جيت اغضّي شفت لهموم حرّاس
يا كثر أحمالي وطول احتمالي * والدهر معروف عنه شدّة الباس
ولي ما يجاري حادثات الليالي * يتعب وكل وقتٍ له اسلوب ولباس
حدٍ بهالدنيا ابد ما يبالي * وحدٍ في كل شي له حسابٍ وقياس
ولكل أمرٍ لو تمادى زوالي * لا دامت أفراحٍ ولا دامت أتعاس
الله من طاري بفكرٍ طرالي * سيطر على الاحساس عن كل هوجاس
خذني براس النايف اللي فضالي * والافكار من كثر الموازين ترّاس