عشر أشياء

حشى لولا عشر خصك بها ربي عن الباقين
أبد ما كان من شافك تطيح الناس من عينه
دلع لين وشقى خف دم ومخملية عين
خجل ملح وجمال وصدق هنا للي تحبينه
ظلمتي من يجي بعدك يجون وكنهم مقفين
قهرتي من يجي قبلك لو إنه شمس تخفينه
يغاير كوكب الأرض السماء الدنيا متى تمشين
يقول إنه حظيظ اللي تواضعتي تدوسينه
لو الله زوج شمس لقمر ثم أنجبوا نجمين
حشى ما جابوا اللي يشبهك نوره ولا زينه
بنفسج نرجس ونوار خزامى سوسن وياسمين
ربيعن ينبت بثغرك ترى لو ما تبلينه
وأنا عني خلقت أسجد لربي وألتزم بالدين
وأفكر كيف أسوي شي في دنياي ترضينه
أحبك وأعشقك وأحيا بحبك لين أقول أمين
وليفٍ بالوفا والحب أنا أول من تعدينه
وعلى الكون الحرام إنه من أول خلقته للحين
أبد ما زاره اللي يحاليك بموازينه
وحشى لولا حلاك اللي رفع قدرك عن الباقين
أبد ما كان من شافك يشوف الجنة بعينه