ما ملى غيرك العين

والله والله ما ملى غيرك العين
لا غيرك اللي شد روحي بالملا
ضيك أسرني من بعد غربة سنين
ياللي قبل لقياك هالدنيا خلا
مثلك مثل ذاك القمر ماله اثنين
لا لاح زولك قالت الدنيا هلا
دمك خفيف ورقتك تدهش اللين
طبعك عسل دايم نعم ما فيه لا
أناظرك وأطير مالي جناحين
لكن غرامك طار بي وفوق اعتلى
لك من فريد الوصف الأجمل وتدرين
من كل طبع طبعك إنتي الأكملى
سميت من شفتك علي تطلين
ذكرت ربي وغنت عروقي ولا
دفا عيونك والمشاعر واليدين
فيني سرا والبرد ولى وانجلى
يحق لي لو صغت لجلك دواوين
لو عشت عمري وخاطري لك ما سلا
روحي معك روحك معي لو تغيبين
صبح ومسا لك المحبة والغلا
يا رب تحفظها مدى العمر أمين
تحفظ نظر عيني من عيوني الملا